Singapúr, Víetnam og Kambódía

Ferðaáætlun

Smelltu á dag til að sjá nánari lýsingu.

1. 0110. febrúar 2027Flug til Singapúr

   Flogið frá Keflavík með FI454 til London kl.16:20 og lent á Heathrow-flugvelli kl.19:30. Áfram er flogið með SQ321 til Singapúr kl.21:45. Singapore Airlines er það flugfélag sem flestir farþegar hafa á undanförnum árum gefið hæstu einkunn, ekki síst vegna frábærrar þjónustu. Allur matur og drykkir eru ókeypis um borð.

2. 0211. febrúar 2027Singapúr

   Lent á Changi-flugvelli í Singapúr kl.19:00. Ekið inn í miðborgina (45 mín.) og innskráning á Hotel Parkroyal on Beach Road (4*). Margir vilja eflaust hvíla sig eftir flugið og fá sér bara matarbita á hótelinu, en einnig er hægt að bregða sér út að borða í næsta nágrenni. Singapúr er heimsfræg fyrir dásamleg veitingahús af fjölbreyttasta tagi. Matargerðarlistin er oft bræðingur af því besta frá Kínverjum, Indverjum, Malajum og jafnvel Aröbum. Sumir segja að hvergi í heiminum sé betra að borða en í þessari borg. (M, H)

   
3. 0312. febrúar 2027Singapúr

   Eftir morgunverð á hótelinu er farið í kynnisferð um borgina kl. 9:00. Singapúr er einstakur staður, ein glæsilegasta heimsborg Asíu þar sem gífurlegur metnaður ríkir á öllum sviðum, enda efnahagurinn betri en víðast á Vesturlöndum og velmegunin augljós. Landrými er takmarkað og því mikið um háar, fallegar byggingar en vandlega gætt að skilja hvarvetna eftir spildur af upprunalegum frumskógi eyjarinnar á milli húsa, mörg hundruð græn svæði, bæði stór og smá. Við byrjum á að aka um hverfið sem var kjarni nýlendustjórnar Breta og sjáum m.a. Krikketklúbbinn, þinghúsið og ráðhúsið. Því næst er heimsóttur einn frægasti grasagarður heims, National Orchid Garden, sem er á heimsminjaskrá UNESCO. Þar er að finna 60 þúsund tegundir af brönugrösum. Á bakaleiðinni til miðborgarinnar er ekið eftir Orchard Road þar sem einhverjar glæsilegustu verslanahallir Asíu standa í röðum. Þá er staldrað við í Merlion Park, við Marina Bay þar sem áður var umskipunarhöfnin, en segja má að sé nú miðpunktur Singapúr. Kringum þetta lón, þar sem Singapore River, lífæð borgarinnar, rennur til sjávar, skartar allt um kring stórfenglegum mannvirkjum sem sum hver, eins og t.d. Marina Bay Sands hótelið, teljast meðal mögnuðustu afreka byggingarlistar nútímans í heiminum. Kynnisferðinni lýkur í Chinatown, Kínahverfinu, þar sem nýr og gamall tími tvinnast saman á skemmtilegan hátt – hefðbundnar búðir, listiðnaður, veitinga- og kaffihús. Við skoðum m.a. stærsta Búddamusterið í hverfinu. Eftir hádegi fer hver sinna ferða í Singapúr. Úr mörgu er að moða. Urmull af söfnum, áhugaverðum mannvirkjum, verslunarhverfum, veitingahúsum o.fl. Einfaldasta og einna vinsælasta tegund matstaða í Singapúr kallast Hawker Centre, sem er það sem við þekkjum sem mathallir. Þar má fá gómsæta máltíð með stórum bjór fyrir um 1.000 ISK, en annars er verðlag fremur hátt á veitingahúsum í Singapúr. Uppástungur: Fá sér „Singapore Sling kokteil“ á Raffles-hótelinu og/eða Lantern Bar á þaki Fullerton Bay Hotel. Skoða Marina Sands Hotel og fara upp í „skipið“, á toppi turnanna þriggja og horfa yfir borgina og höfnina. Í kjallara Marina Sands hótelsins er stærsta spilavíti Asíu. Í Singapúr er einnig fjöldi góðra safna, s.s. National Museum of Singapore, Asian Civilisations Museum, Peranakan Museum og Singapore Art Museum. (M)

   
4. 0413. febrúar 2027Singapúr – Víetnam

   Morgunverður og útskráning á hótelinu. Brottför kl. 10:00 og ekið út á Changi-flugvöll þaðan sem flogið er með SQ196 kl.12:35 til Hanoi og lent þar kl.15:05. Ekið á Hotel Grand Mercure Hanoi (5*) þar sem gist verður næstu þrjár nætur. ATH – ferðaskrifstofan sækir um vegabréfsáritun til Víetnam fyrir alla farþega. (M)

5. 0514. febrúar 2027Hanoi

   Að loknum morgunverði kl. 8:30 er lagt af stað í heils dags kynnisferð um Hanoi. Fyrst er farið á matvælamarkaðinn. Við göngum um þrönga ganga og ranghala þar sem ýmis forvitnileg matvara er seld. Þarna er ævinlega iðandi mannlíf, borgarbúar að draga björg í bú. Þá er ekið að Ho Tay (Vesturvatni) og skoðað Búddahofið Tran Quoc sem byggt var á 6. öld e. Kr. Þá liggur leiðin á Víetnamska þjóðfræðisafnið þar sem fá má allgóða mynd af fjölbreyttum uppruna kynþátta og sögu víetnömsku þjóðarinnar í aldanna rás. Síðan er haldið að vatninu Hoan Kiem og skoðaður minnisvarðinn um Ly Thai To keisara sem gerði Hanoi að höfuðborg ríkis síns, árið 1010. Að svo búnu er snæddur hádegisverður á ljómandi góðu veitingahúsi sem nefnist Rue Lamblot. Eftir matinn er stutt ökuferð til hins fræga Musteris bókmenntanna, sem var eini háskóli landsins frá 1076 og fram á 19. öld. Loks er farið í gönguferð um elsta borgarhverfi Hanoi þar sem má fá nasasjón af hefðbundnum lífsvenjum Víetnama. Gönguferðinni lýkur á markaðnum Hang Be. Síðast á dagskránni er svo Vatnsbrúðuleikhús, sem er einstakt listform iðkað í Norður-Víetnam. (M, H)

   
6. 0615. febrúar 2027Hanoi

   Að loknum morgunverði kl. 8:30 er lagt af stað í skoðunarferð um Hanoi. Þá er haldið til eins frægasta staðar borgarinnar sem er fangelsið Hoa Lo. Þar geymdu Frakkar félaga úr andspyrnuhreyfingunni um miðja 20. öld en síðar, í Víetnamstríðinu á 7. áratugnum og fram til 1975, sátu þar aðallega bandarískir stríðsfangar, þeir sem sluppu lifandi þegar sprengjuflugvélar þeirra voru skotnar niður yfir Norður-Víetnam. Fólkinu í Hanoi var ekki sérlega hlýtt til Bandaríkjamanna sem fleygðu meira magni af sprengjum yfir borgina og nágrenni hennar en sem nam öllum sprengjum sem allir stríðsaðilar notuðu í seinni heimsstyrjöldinni. Bandarísku flugmennirnir uppnefndu Hoa Lo „Hanoi Hilton“. Hádegisverður er snæddur á góðum veitingastað sem heitir Koto. Síðan er haldið til torgsins Ba Dinh, þar sem Ho Chi Minh lýsti yfir sjálfstæði Víetnams árið 1945. Þaðan göngum við að húsinu sem Ho Chi Minh bjó í á árunum 1958–1969 og stýrði hreyfingunni sem hann lifði ekki að sjá vinna fullnaðarsigur yfir her Suður-Víetnam og Bandaríkjanna, árið 1975. Í grenndinni stendur svo Einnar súlu Búddahofið sem reist var árið 1049 og er meðal frægustu fornminja Víetnams. Þessari ferð lýkur um kl.15 svo gott ráðrúm gefst til að skoða sig um á eigin spýtur eða njóta lífsins á annan hátt það sem eftir lifir þessa síðasta dags í Hanoi. (M, H)

   
7. 0716. febrúar 2027Halong-flói

   Kl.8:30 er brottför frá hótelinu. Haldið til strandar og ekið um búsældarlegar sveitir Rauðársléttunnar, og síðasta spölinn yfir nýja brú sem er sú lengsta í Suðaustur-Asíu. Komið til hafnarbæjarins Halong, þangað sem við verðum sótt um kl.11:30. Þar erum við boðin velkomin með tedrykkju á hafnarbakkanum áður en haldið er með skipsbáti út að skemmtiferðasnekkjunni Dragon Legend Cruise (5*), þar sem gist verður næstu tvær nætur. Þegar innskráningu er lokið og fólk hefur fengið sína einkakáetu hefst sigling um Bai Tu Long flóa, hluta af Halong-flóa, sem er eitt af undrum veraldar á heimsminjaskrá UNESCO. Kl.13:15 er gómsætur hádegisverður snæddur um borð og svo hefst sigling um Cap La svæðið. Tækifæri gefst til að fara á kajak og kanna þetta töfraumhverfi. Kalksteinsklettarnir sem gnæfa hvarvetna upp úr haffletinum eru tilkomumikil og heillandi sjón. Þetta svæði er tiltölulega ósnortið í samanburði við fjölfarnari hluta Halong flóa, því fáir skemmtiferðarbátar sigla enn sem komið er þessa leið. Kl.16:00 er komið aftur um borð í snekkjuna og hægt að hvílast eða njóta sólar uppi á dekki. Kl.19:00 er snæddur ljúffengur veislumatur, matbúinn af færu fagfólki um borð. Eftir mat er tilvalið að njóta flóastemmningarinnar uppi á efra dekki, reyna sig við smokkfiskveiðar eða panta sér nudd. (M, H, K)

   
8. 0817. febrúar 2027Sigling um Bai Tu Long flóa

   Kl. 7:30 er boðið upp á Tai Chi æfingar á sólardekki meðan sól rís úr sæ. Morgunsvalinn er hressandi. Morgunverður er kl. 8:00 í veitingasalnum, þaðan sem gott útsýni er yfir flóann. Og skipið siglir af stað. Kl. 8:45 er farið í land að skoða Thien Canh Son hellinn, sem er fegursti hellir í Bai Tu Long flóa, þar sem getur að líta skrautleg dropasteinskerti sem verið hafa að myndast í þúsundir ára. Tækifæri gefst til að kanna Hon Co eyju á kajak. Kl.10:30 er stigið aftur á skipsfjöl og siglt áfram til Cong Dan þar sem hægt er að synda og njóta lífsins í tandurhreinni sandfjöru. Kl.12:30 er grillveisla á ströndinni sem skipskokkarnir sjá um. Strandlífið heldur áfram til kl.14:30 þegar haldið er aftur til skips. Eftir það er frjáls tími til hvíldar eða skemmtunar á snekkjunni sem er bæði fögur og fjölbreytileg, en kl.17:30 hefst á dekki sýnikennsla í matreiðslu, stjórnað af yfirmatsveini Dragon Legend. Kl.19:00 er kvöldverður fram borinn. Síðan er hægt að njóta lífsins og jafnvel renna fyrir smokkfisk. (M, H, K)

   
9. 0918. febrúar 2027Saigon

   Kl. 6:15 er aftur boðið upp á hressandi og endurnærandi Tai Chi meðan flóinn skartar sinni morgunfegurð. Morgunverður er borinn fram kl. 7:00. Kl. 7:45 er farið í land til að skoða Vung Vieng, afskekkt fiskiþorp með afar fögru umhverfi. Fiskimenn á bambusbátum bjóða okkur að kynnast sínum einstöku lífsháttum. Kl. 9:00 er farið aftur um borð í snekkjuna og nú þarf að pakka niður og undirbúa brottför. Gómsætur dögurður er borinn fram meðan siglt er til hafnar. Við komum í land kl.11:30 og stígum um borð í rútuna sem ekur okkur til Hanoi-flugvallar. Flogið með VN255 kl.16:00 til Saigon og lent þar kl.18:15. Við höldum beint á vandaðan veitingastað sem heitir Hoa Tuc og snæðum saman kvöldverð áður en farið er á hið fræga Rex Hotel (5*) í hjarta borgarinnar, þar sem við gistum næstu 3 nætur. Rex hótelið var oft í brennidepli í Víetnamstríðinu því þar hélt bandaríska herstjórnin sinn daglega blaðamannafund sem útvarpað var um heim allan og hófst með ávarpinu „Good morning, Vietnam“. (M, dögurður, K)

   
10. 1019. febrúar 2027Saigon

    Að loknum morgunverði kl. 8:30 er lagt af stað í skoðunarferð um þessa glæsilegu, gömlu höfuðborg Franska Indókína, sem gekk undir nafninu „París Austurlanda“. Fyrst er skoðuð frægasta bygging borgarinnar, Pósthúsið, sem líklega var teiknað af Marie-Alfred Foulhoux en er oft eignað Gustave Eiffel sem hannaði Eiffel-turninn. Pósthúsið var reist á árunum 1886–1891. Í grenndinni stendur Notre Dame dómkirkjan, einnig byggð af Frökkum í lok 19. aldar. Farið í heimsókn í Gialong-höllina sem hýsir Safn Ho Chi Minh borgar og fræðst um stormasama sögu Saigon. Gengið um „Le Loi“ götu og staldrað við hjá listamanni sem sérhæfir sig í hefðbundnu ristuþrykki. Hádegisverður er snæddur á afbragðs veitingahúsi sem nefnist Dining Room. Þá er gamli markaður miðbæjarins skoðaður, rölt um stræti elsta borgarhlutans og tyllt sér niður til að fá sér hressingu á einhverju af hinum frægu, sjarmerandi kaffihúsum sem prýða staðinn. Að svo búnu er hægt að velja um að láta aka sér heim á hótel eða verða eftir á Ben Thanh markaðnum til að versla og sjá sig frekar um. (M, H)

    
11. 1120. febrúar 2027Cu Chi göngin

    Lagt af stað 8:30 að loknum morgunverði í um rúmlega klukkustundar bílferð norður fyrir borgina að skoða hin frægu Cu Chi göng, sem er eins konar safn mannvirkja og hergagna og einhverjar merkilegustu minjar um Víetnam-stríðið sem hægt er að sjá í landinu. Leiðin liggur um fagrar sveitir. Til baka er ferðast á hraðbáti niður Saigon-ána. Siglingin tekur 1,5 klukkustund. Eftir hádegið er hægt að sjá sig um í borginni á eigin spýtur. Margt er að skoða í Saigon, t.d. ekki fráleitt að bregða sér á Stríðsminjasafnið eða skoða forsetahöll Suður-Víetnam. Þá er ekki úr vegi að fá sér kaffi eða aðra hressingu á 52. hæð Bitexo, hæstu byggingar borgarinnar, þaðan sem útsýnið er einstakt. Um kvöldið gefst kostur á að kynnast hinum víðfræga víetnamska götumat og næturlífinu í Saigon undir handleiðslu staðarleiðsögumanns okkar. Þessi ferð, sem er utan dagskrár og ekki innifalin í verði, verður nánar kynnt síðar. (M)

    
12. 1221. febrúar 2027Saigon – Cai Ba – Can Tho

    Kl. 8:30 að loknum morgunverði er Rex Hotel kvatt og ekið áleiðis til Mekong-óshólmanna, sem eru eitthvert rómaðasta gósenland Asíu. Engar ýkjur eru að þar drjúpi smjör af hverju strái. Eftir ósigur Frakka í orrustunni við Dien Bien Phu árið 1954, sem markaði endalok nýlenduveldis þeirra í Indókína, voru það þung spor fyrir margar franskar fjölskyldur að yfirgefa sveitirnar á Mekong-svæðinu sem í sumum tilfellum höfðu verið heimkynni þeirra kynslóðum saman. Enn í dag hugsa allmargir Frakkar til þessa „heimalands síns“ með sárum söknuði. Á leiðinni til óshólmanna er höfð viðkoma í Cao Dai kirkju, guðshúsi einstakra trúarbragða, sem eru einskonar sambland af taóisma, Búddisma og Konfúsíusarhyggju ásamt kristni og íslam, sem margar milljónir manna í Víetnam aðhyllast. Við ökum fyrst til bæjarins Cai Be og fáum þar prívat-júnku til að sigla á um ána. Fyrst heimsækjum við fræga fljótandi markaði. Eftir að komið er aftur á þurrt land skoðum við ýmiskonar heimaframleiðslu, s. s. á hrískökum, hrísgrjónapoppkorni og kókoshnetukaramellum. Við siglum svo áfram milli sígrænna og fagurra Mekong-óshólmanna eftir margslungnu neti ótal þveráa, sunda og síkja. Hádegismatur er borinn fram fram á veitingastað á einni eynni áður en við förum aftur um borð í júnkuna og siglum í rólegheitum áfram til Vinh Long. Þar er farið í land og stigið upp í rútuna sem flytur okkur til Can Tho, höfuðborgar Mekong-svæðisins, þar sem gist er næstu tvær nætur á Hotel Charmant Suites (5*). (M, K)

13. 1322. febrúar 2027Can Tho

    Að loknum morgunverði er haldið í skoðunarferð um borgina og farið á bátum að heimsækja fljótandi markaðinn Cai Rang. Síðan er siglt um mörg og margvísleg síki, þar sem krökkt er af bátum fólks sem kemur úr nærliggjandi sveitum að selja afurðir sínar, aðallega grænmeti og ávexti. Þetta er litríkt mannlíf. Can Tho er háskólaborg með yfir milljón íbúa. Hún stendur á mótum þriggja vatnsfalla í landfræðilegri miðju Óshólmanna. Þetta svæði var á miðöldum hluti af heimsveldi Kmera (sem við eigum eftir að kynnast betur í Siem Reap) og enn í dag á verulegur hluti íbúanna ættir að rekja til Kmera. Eftir hádegi gefst ráðrúm til að svipast um á eigin spýtur, en um kvöldið er snæddur sameiginlegur kvöldverður á hótelinu. (M, K)

    
14. 1423. febrúar 2027Chau Doc

    Morgunverður er snæddur á hótelinu og síðan skráð sig út og haldið áfram upp með Mekong-fljóti til Chau Doc. Þetta er drjúgur spölur, næstum 3ja klst. akstur, en komið við á nokkrum stöðum, m.a. á gríðarstórum krókódílabúgarði. Eftir komuna til Chau Doc er völ á bátsferð til að kynna sér fiskirækt sem stunduð er í kvíum á Mekong. Kvöldverður snæddur á Hotel Victoria Chau Doc (4*) þar sem við gistum um nóttina. (M, K)

    
15. 15Siglt til Kambódíu

    Að loknum morgunverði er haldið með hraðbáti (frá bryggju Victoria-hótelsins) upp Mekong-fljót. Stutt er til landamæra Kambódíu frá Chau Doc. Við dveljum smástund við landamærastöðvar beggja landanna þar sem við fáum stimpil í passana. Þar þarf að hafa tiltæk vegabréfin og 37 USD (í seðlum). Um 5 klst. ánægjuleg sigling er með hraðbátnum til Phnom Penh. Á leiðinni er hægt að virða fyrir sér mannlífið á bökkum Mekong-fljóts og afbragðs tækifæri gefast til myndatöku. Komið til Phnom Penh, sem stendur á mótum stórfljótanna Mekong og Tonlé Sap, um hádegisbil. Að lokinni innskráningu á Royal Palace Gate Hotel, sem er frábært 5 stjörnu hótel rétt hjá konungshöllinni í miðri borginni, gefst góður tími til að skoða sig um eða slaka á við sundlaug hótelsins. Phnom Penh var álitin ein fegursta borg Franska Indókína. En á tímum ógnarstjórnar Rauðu Kmeranna 1975–1979 voru nær allir íbúarnir reknir út úr borginni með fádæma harðýðgi og hnepptir í þrælkunarvinnu í sveitum. Undanfarna áratugi hefur samt sem áður gengið býsna vel að hleypa nýjum krafti í borgarlíf Phnom Penh og sérlega gaman að ganga þar um göturnar, kíkja á markaði og setjast niður á veröndum kaffihúsa eða góðum veitingastöðum sem enginn skortur er á, einkum á árbakkanum, ekki langt frá frá hótelinu okkar. Þetta er heillandi borg, í senn vestræn og asísk, með breiðgötum, fögrum pagóðum og glæsilegum byggingum frá nýlendutímanum. (M)

16. 1625. febrúar 2027Phnom Pehn

    Að loknum morgunverði kl. 8:30 er farið í skoðunarferð þar sem við fræðumst m.a. um þann hrylling sem kalla mætti helför kambódísku þjóðarinnar, þegar Pol Pot og Rauðu kmerarnir myrtu um þrjár milljónir landa sinna, á tæpum fjórum árum. Fyrst er heimsótt safn í gömlu skólahúsi, Tuol Sleng, þar sem starfrækt var skelfilegasta fangelsi Rauðu kmeranna, S-21. Því næst höldum við til aftökustaðarins illræmda í Choeung Ek sem umheimurinn kallar Killing Fields upp á ensku. Þar lét fjöldi fólks lífið og er hægt að sjá ýmsar minjar um fórnarlömbin og örlög þeirra, fjöldagrafir og „stúpu“ fulla af hauskúpum. Eftir heimsóknina á þennan óhugnanlega stað er snæddur dásamlegur hádegismatur á víðfrægu veitingahúsi sem nefnist Malis. Matreiðslumeistarinn er líklega frægasti stjörnukokkur Kambódíu, Luu Meng. Eftir matinn er farið að skoða Konungshöllina sem fullgerð var árið 1866 á nýlendutíma Frakka. Við hlið hallarinnar stendur Silfurpagóðan sem dregur nafn af fimm tonnum af skínandi silfri sem lögð voru í gólfið. Upphaflega nafnið er Wat Prakeo sem þýðir Musteri hins smaragðsgræna Búdda. Að þessu loknu er haldið heim á hótelið, sem er í gangfæri við konungshöllina, og þykir þá kannski einhverjum mál að fá sér hressingu, t.d. á þakbarnum með útsýni yfir hallargarðinn. (M, H)

    
17. 1726. febrúar 2027Phnom Pehn – Siem Reap

    Morgunverður á hótelinu og brottför til flugvallar kl.10:30. Flogið með K6107T til Siem Reap kl.13:30 og lent þar kl.14:25. Siem Reap liggur rétt við hlið þess makalausa svæðis þar sem á síðari hluta miðalda stóð stórborg með um milljón íbúum, meðan mannfjöldi margra helstu borga Evrópu fór varla yfir 200.000. Þetta var höfuðstaður stórveldis Kmera sem um alllangt skeið náði yfir stór svæði Suðaustur-Asíu. Angkor Thom var stjórnarsetrið og aðalmusterið, Angkor Wat, er stærsta guðshús sem fundist hefur í Suðaustur-Asíu. Siem Reap er einkar aðlaðandi 150.000 manna bær, fallega staðsettur á árbökkum. Eftir könnun á fornminjum að morgni er ánægjulegt að ganga þar um eftir hádegið og skoða fagrar byggingar, markaði og litríkt götulíf. Angkor Village Hotel er einstakur gististaður og í gangfæri við miðbæinn þar sem aðalmarkaðurinn og flest veitingahúsin og krárnar eru, ekki síst við „Pub Street“. Hótelið er afskaplega notalegt og þar er ljómandi góð sundlaug, fagrir garðar og ýmislegt annað sem hjálpar fólki að njóta lífsins. Þennan fyrsta dag í Siem Reap er boðið upp á kvöldverð á glæsilegu veitingahúsi hótelsins. (M, K)

18. 1827. febrúar 2027Siem Reap, Angkor Wat

    Eftir morgunmat kl. 8.30 er byrjað á að skoða eitt af frægustu mannvirkjum veraldar, Angkor Wat, stærsta musteri í heimi sem reist var á ríkisstjórnarárum Suryavarmans II konungs á fyrri hluta 12. aldar. Angkor Wat mun vera ætlað að tákna fjallið Meru, bústað guðanna. Að innan eru veggir musterisins þaktir höggmyndum og lágmyndum sem endurspegla goðsagnir hindúa, m.a. 2.000 Apsara-dansmeyjar, og hetjusagnir af hernaði Suryavarmans konungs. Mynd af Angkor Wat prýðir nú þjóðfána Kambódíu, þar sem hofið þykir táknrænt fyrir þjóðarsálina. Því næst er heimsótt annað hof, Ta Prohm, sem reist var nokkrum áratugum eftir Angkor Wat af Jayavarman VII konungi, undir aldamótin 1200. Ólíkt öðrum fornum byggingum á svæðinu, sem fallin voru í gleymskunnar dá og höfðu nánast orðið frumskóginum að bráð, var ákveðið að leyfa þessu búddahofi að vera áfram nánast í því ástandi sem það fannst í til að sýna hvernig náttúran getur leikið mannanna verk. Ta Prohm hefur verið notuð sem leikmynd nokkurra ævintýrakvikmynda, en frægust þeirra er The Tomb Raider með Angelinu Jolie. Hádegisverður er snæddur á veitingastaðnum Salabai, sem er í hótel- og veitingaskóla fyrir nemendur sem hljóta þar ókeypis skólavist, þar sem þeir eiga annars ekki kost á að menntast vegna fátæktar. Við höfum ævinlega fengið ljómandi góðan mat á Salabai og ánægjulegt að fylgjast með hinu efnilega unga fólki og styðja um leið við þessa frábæru hugsjónastarfsemi. Síðdegið er frjálst. (M, H)

    
19. 1928. febrúar 2027Angkor Thom

    Að loknum morgunverði kl. 8:30 er farið að skoða hina fornu höfuðborg Kmeraveldisins, Angkor Thom, sem er umlukt átta metra hárum múr. Farið er inn um hið mikilfenglega suðurhlið, úr steini með höggmyndum af fílum og fjórum ógnarstórum andlitum. Beggja vegna hliðsins eru 54 guðir og djöflar sem halda í hina heilögu Naga-slöngu. Síðan er haldið til Bayon-hofsins sem stendur nákvæmlega í miðpunkti Angkor Thom. Þessi fagra bygging frá 12. öld skartar 54 turnum sem tákna 54 skattlönd hins mikla stórveldis Kmera. Hádegisverður er snæddur á Malis, glæsilegasta veitingastað Siem Reap (sami eigandi og Malis Phnom Penh), áður en haldið er heim á hótel. Síðdegið er frjálst en þeir sem vilja eiga völ á skipulagðri kvöldferð. (M, H)

    
20. 201. mars 2027Heimflug hefst

    Morgunverður á hótelinu og útskráning fyrir hádegi á Angkor Village. Brottför til flugvallar er kl.13:30. Flogið með SQ 165 kl.16:45 til Singapúr (farangurinn skráður alla leið til Íslands), lent þar kl. 20:10 og síðan áfram með SQ324 til Amsterdam kl. 23:55. (M)

21. 212. mars 2027Heimkoma

    Lent á Schiphol-flugvelli í Amsterdam kl. 6:45 og haldið áfram kl.12:55 með FI501 heim til Íslands. Lending í Keflavík kl.15:25.

22. 22Hagnýtar upplýsingar

    Fullnaðaruppgjör er 70 dögum fyrir brottför. Farþegar verða að gæta þess að vegabréf séu gild í minnst 6 mánuði eftir upphafsdag ferðar. Staðfestingargjald er óafturkræft nema ferðaskrifstofa þurfi að hætta við ferðina. Ferðaskrifstofan áskilur sér rétt til að breyta verði ef til stórfelldrar gengisbreytingar íslensku krónunnar kæmi gagnvart USD, en þá væri farþegum auðvitað frjálst að hætta við þátttöku og fengju staðfestingargjald endurgreitt. Verð ferðarinnar er miðað við að greitt sé með millifærslu en ekki kreditkorti. Hagræði farþega af því að borga með kreditkorti er sáralítið, en hefði í för með sér verulegan kostnaðarauka fyrir ferðaskrifstofuna sem óhjákvæmilega hlyti að hækka ferðaverðið. Það heyrir sögunni til að ferðatryggingar sem fylgja kortum séu skilyrtar því að ferðakostnaður hafi verið greiddur með kortinu. Korthafinn er alltaf tryggður hvernig sem hann borgar ferðina, þetta má fá staðfest hjá viðskiptabanka. Ferðaskrifstofan sækir um vegabréfsáritun til Víetnam á netinu (e-visa) fyrir alla farþega. Ferðaskrifstofan FERIA gefur út farseðla. Örnólfur hannar og skipuleggur ferðina, velur áfangastaði, gististaði og annast alla ferðartilhögun. Fararstjórar í þessari ferð eru Örnólfur Árnason og Baldvin Hafsteinsson. Enskumælandi staðarleiðsögumenn eru alltaf með í för til að miðla fróðleik og sjá um að allt gangi eftir áætlun.

Gisting

• Hotel Parkroyal on Beach Road ★★★★Singapúr
• Grand Mercure Hanoi ★★★★★Hanoi
• Dragon Legend Cruise★★★★★Halong-flói
• Rex Hotel★★★★★Saigon
• Charmant Suites★★★★★Can Tho
• Hotel Victoria Chau Doc★★★★Chau Doc
• Royal Palace Gate Hotel★★★★★Phnom Pehn
• Angkor Village Hotel★★★★★Siem Reap

Verð

Innifalið og ekki innifalið

Skráning og fyrirspurnir